Bíbí West

2011-10-17T00:18:00.001+01:00

rugla sat á kvisti
átti krónu og missti
ein tvær þrjár
nú er hart í ár
-i

2011-09-02T00:06:00.000+01:00

Bíbí goes West

2011-09-01T23:28:00.001+01:00

2011-09-01T22:10:00.004+01:00

Hengi upp þvottinn og kinka kolli til félaga minna, fólksins í sjónvarpinu. Læt mig dreyma um leikhús og ráðgeri svei mér þá að gera mögulega og ef til vill eitthvað í því. Sjónvarpið á silent og Miles Davis dubbar dramað. Ekki sem verst oseiseinei, ekki sem verst. Svona gerum við er við hengjum okkar þvott, hengjum okkar þvott, hengjum okkar þvott ...

Gleðilegan fjallkonudag!

2011-06-17T11:32:00.002+01:00

Dancing in da Underground

2011-05-12T13:56:00.000+01:00

Þetta gerir fólk
bara sí svona
í Barcelona

2011-05-12T13:48:00.003+01:00

Þegar himininn er svona heiður og blár
fer ég að hugsa um heimsendi
síðan helli ég upp á útlenskan grasadrykk
minni mig á takmörkun valdsins
og hugsa með mér
að allt hafi sinn tíma.

Barcelona

2011-04-19T17:11:00.002+01:00

2011-03-17T13:57:00.004Z

Í fjarverunni býr kynþokki

kannski gefur hún líf

Dirrindí

2011-03-17T13:50:00.003Z

Þetta er gott:
marr í snjó og frostbitnar kinnar, kuldi sem þyrlar upp rykinu sem liggur eins og þykkt ullarteppi yfir sofandi huga, heilasellur sem vakna af vetrardvala, vorið í hjartanu.

2011-02-05T15:33:00.007Z

Þegar að maður á mann sem situr einmitt þessa stundina í lest í öðru landi, er fátt annað að gera en að búa til lista yfir þær gjörðir og athafnir sem fylla tímarúmið í Vesturbænum þessar þrjár vikur sem hann mun vakna í útlenskri sveit:

a) láta sig dreyma um útsýnið úr lestinni.
b) fara í nýja fótboltaskó og þvo upp úr nýja vaskinum í eldhúsinu.
c) lyfta sér á kreik með öðrum elskum (= vinkonum).
d) dekra við dætur.
e) dansa við dætur.
f) borða afmælistertu með mömmu sinni.
g) arka niður í hús við Tjörn og sjá þar leikrit um Súldarsker.

á nóttunni ætla ég líka að ferðast til Evrópu, sitja í lest og leyfa útsýninu að hreinsa gáttir hugans. Grængrængræn eru trén í breskri sveit.....

2010-08-22T18:18:00.002+01:00

Tove Janson á átti eyju og bát. Hún átti líka svartan kött og kærustu sem reykti eins og strompur. Þökk sé sænska ríkissjónvarpinu hef ég horft á Tove dansa við kött, inni í kofa á lítilli eyju. Íslendingar eiga sér sína Tove og ég veit hver það er, liggaliggalálá! En þetta veit ég ekki: Hvað hét kötturinn hennar Tove og hvaða sígarettutegund reykti kærastan hennar?

2010-08-16T00:54:00.000+01:00

2010-08-16T00:43:00.004+01:00

Ég er ekki byrjuð að steikja, ekki einu sinni búin að henda í deigið, er rétt farin að
leiða hugann að því að láta loksins verða af því að baka þessa blessuðu ástarpunga, þegar herbergið fyllist af daufri angan af steikingarfeiti og ég velti því fyrir mér hvort að lamma mín heitin sé gengin aftur. Les eftirfarandi í handskrifaðri uppskriftabók:

Ef feitin er heit þá brenna ástarpungarnir að utan en verða hráir í miðjunni.

Monkfish

2010-03-24T09:43:00.001Z

Hún: Heyrðu, þetta gengur ekki. / Hann: Ha? Hvað meinarðu? / Hún: Þetta er búið. / Hann: Hvað gerði ég vitlaust? / Hún: Sko, þú ert frábær að mörgu leiti, sexy, góður í rúminu ... gefandi ... þú gerir margt rétt ... vantar kannski stundum dáldið upp á húmorinn ... en þetta með skötuselinn var kornið sem fyllti mælinn. / Hann: Ha? Þetta með skötuselinn?! En þú verður að sýna smá samstarfsvilja! / Hún: (ákvðeðið) Nei, SKÖTUSELUR! (fer)

2010-03-17T13:29:00.002Z

Kaffi á brúsa. Kona í bás. Glíman við Exel.

2010-03-03T12:38:00.001Z

2010-01-24T12:17:00.005Z

Það var hann afi minn sem kenndi mér að standa á haus. Þá var hann kominn fram yfir sextugt. "Þú þarft bara að ímynda þér að þú sért þriggja fóta kollur, þannig finnurðu jafnvægið..." Svo lék hann fyrir mig þriggja fóta koll á gólfinu í sparistofunni á Hvilft, við hliðina á gamla sófanum með bogadregna bakinu sem fannst í fjörunni í fyrndinni - eftir að heldri manna skip frá Noregi hafði strandað í firðinum. Ég æfði mig frameftir degi, á meðan afi fór aftur út í skemmu að stússa. Seinni partinn var ég svo búin að mastera kollinn og við endurtókum leikinn ... saman á teppalögðu sparistofugólfinu. Þannig var hann afi minn.

Bíbí

2010-01-24T12:14:00.002Z

dvelur sig nú og felur í þröngum firði þar sem geislarnir sleikja hlíðarnar enn sem komið er. Þannig vinna fjöllin og sólin saman og gera íbúunum viðvart svo þeir nái að setja upp sólgleraugun í tæka tíð því eldhnötturinn birtist í næstu viku og þá er eins gott að vera viðbúin.

síðasta myndin

2010-01-14T13:24:00.001Z

Yfirlýsing

2010-01-11T15:06:00.005Z

Ég hef ákveðið að hefja björgun á eigin skinni, hætta að hlusta á fréttir og einbeita mér í staðinn að hinu glaða og fagra.

í góðu kompaníi (við Sa... og Sa...)

2009-12-19T15:08:00.012Z

Í dag
ætla ég að stíga dansinn
við Jean-Paul
og fagna
því
að
maðurinn er tilgangslaus
ástríða.

Eric sér um undirspilið

sa og sa
og tja tja tja!

Moldvarpa (grefur sér gröf?)

2009-12-18T17:42:00.010Z

Ég ætla að vera moldvarpa það sem eftir er dags. Trúgjörn moldvarpa sem hefur ákveðið með sjálfri sér að súkkulaðirúsínur og jólaöl muni gera trikkið. Trúgjörn moldvarpa sem verður fyrir vonbrigðum þegar hún kemst að því að þótt súkkulaði sé sagt gott fyrir heilann þá skrifar það ekki þrjátíu síður kviss bang búmm! En dagurinn var fallegur ójá. Héluð tún og gylltar tjarnir nononoh! Eftir að hafa brýnt raustina og skellt hurð þannig að dyrabjallan datt af karminum arkaði ég niður í bæ og eftir því sem meira blasti við mér af þessum fallega degi - því meira bráði af mér. En nú er ég sumsé komin heim og hugtökin eru óskýr og klessuleg eins og leirinn hennar Franzisku þegar hún er búin að hnoða einn stóran bolta úr ótal lengjum sem upprunalega höfðu sinn litinn hver. Það er hægara gert en sagt að rekja upp akkúrat svona hnykil. Rauður er tilvistarstefnan, grænn er þekkingarfræði, gulur er fyrirbærafræði - en sama hvað ég puða í glímunni við þennan kámuga hlunk þar sem allir litir renna saman og mynda sækadelíska óreiðu. Ómægod, ég veit þú ert ekki dauður.

2009-12-16T21:43:00.001Z

Samviskubit fær fólk til að gera alls kyns vitleysu. Heiðarleiki er betri.

Fagnaðarerindi (eða- Laufabrauð með smjöri)

2009-12-13T10:24:00.008Z

Saman eru laufabrauð og jólaöl hinn ágætasti árbítur, sérstaklega við undirleik kirkjuklukknanna hvers hljómur berst mér úr guðshúsinu handan við skólann. Á milli sopa spái ég í rannsóknir og skýrslur. Á meðan smjörið bráðnar á tungunni velti ég fyrir mér mistökum og líkömum og yfrlýsingum um óhreinindi. Sykursjokkið vofir yfir og ég held áfram að sötra og bryðja og kjammsa og pikka í lyklaborðið með kámugum fingrum. Síðan tek ég dramatíska pásu. Þannig varðveiti ég stóískt hugarflug fræðimannsins. Klukknahljómurinn hækkar og ég neyðist til að líta upp þegar vængjuð vera hamast hvað af tekur í brjósti mínu og brýtur sér að lokum leið út - um bringuna að ég held. Á meðan ég horfi á eftir hvítum vængjum fljúga niður Holtsgötuna, í átt að sjónum, get ég ekki annað en brosað út í annað því ég veit - að þeta blessast...

jarðbundin bæn

2009-11-24T17:06:00.003Z

Móðir vor
þú sem ert á jörðu
helgist þitt nafn
til komi þitt ríki
verði þinn vilji

AMEN

2009-11-08T01:03:00.007Z

"Mamma, hvað er fundarskrá? Mamma, hvað er iðrun? Mamma, hvað er að spekúlera? Mamma er ekki ljótt að segja úti í rassgati?"
Ég bý með ketti, karlmanni, kontrabassa og ... upprennandi vísindamanni sem geymir fiskhausa í krukku og kallar nafnið á bestu vinkonu sinni upp úr svefni. "Urður! Urður!"

Preparation

2009-11-04T01:02:00.001Z

draugur fortíðar

2009-10-25T01:08:00.010+01:00

Hundur

2009-10-24T23:44:00.004+01:00

Játa mig sigraða í bili en birti hér nýtt uppáhald. Svona fyrir þá sem eru ekki löngu búnir að gefast upp á mér hér.

"I was born in London, England on October 26 1958, the youngest of four and much to my parents surprise, I was born a dog. This unfortunate turn of events was soon accepted within my family and was never again mentioned in the presence of polite company."

Úr My Biography e. Ray Caesar.

2009-10-18T20:23:00.007+01:00

Ray Caesar

2009-08-28T01:06:00.006+01:00

áferð frelsisins...

2009-08-17T11:49:00.001+01:00

2009-07-24T14:54:00.001+01:00

kónguló
kónguló
vísaðu mér á berjamó

ég skal gefa þér gullskó

þegar þú kemur aftur

2009-06-29T16:59:00.001+01:00

2009-05-10T23:00:00.003+01:00

Fylli íbúðina af hvítum lökum og þakka fyrir mig. Tími ekki að hrófla við marglitum kreppappír sem þekur sófann enda sakna ég litlu handanna sem rifu hann niður og röðuðu bútunum samviskusamlega um stofuna. Opna kassa og loka kössum. Opna fleiri kassa og loka þeim jafn óðum. Líkaminn ræður ekki við skipulagða samvinnu. Heilinn gefur skipandir, hendurnar hlýða ekki og loka. Lok og stál og allt í plati. Reyni við pokana. Losa um hnúta en bind þá aftur. Uss uss segir hausin, hvursu hvursu stúlkukind? Ætlarðu að búa í pappakassa það sem eftir er ævinnar?! Hann á líka erfitt með samvinnu, hausinn. Þusar bara og skammast. Hvað gera bændur þá? Bíta gras? Man eftir grasi, man eftir söng og man líka sjóinn. Nú er hausinn allur að koma til og gott ef hann er ekki farinn að strjúka el corason um vangann. Skyldum við vera á réttir leið? Reynum aftur...

Fyrir utan gluggann minn

2009-04-10T13:50:00.007+01:00

Veðrið er svona líka gott
og sólin er svona líka hátt á lofti
Það er vor
og auðvitað ætti ég að skella mér í göngutúr
í vorinu
í sólinni
hjá sjónum
en ég get ekki verið ein
ekki núna
í staðinn slekk ég á veðurfréttunum
og sker epli með bitlausum hníf
sneiði
hjá tilverunni fyrir utan
og bíð eftir því að eldingu slá niður

2009-04-10T10:29:00.005+01:00

dagurinn byrjaði reyndar í sundi
i sundbol fléttuðum úr birkigreinum
sem báru óþroskaða brumknappa

(K.Ó.)

2009-04-10T10:27:00.002+01:00

Ef þú sléttir úr dúk hermir þú eftir Guði
Ef þú leggur á borð fyrir þig eina hermir þú eftir Guði

(Kristín Ómarsdóttir)

Andrea frænka æfir sig á píanó

2009-03-03T13:19:00.002Z

Ísafjörður 03.03.09

2009-03-03T12:58:00.003Z

2009-02-17T15:53:00.001Z

umhleypingar = zebrafjöll

2009-02-08T23:33:00.011Z

Þetta var eftirminnilegur dráttur! gólar hann kotroskinn, maðurinn með grímuna og græna hattinn. Með skjálfta í kroppnum öllum halla ég mér fram og miða af veikum mætti á hvítt postulínið. Blóðugt slím neitar að skilja sig frá upphafsstað sínum og ég sit í sömu stellingunni, dofin og bogin yfir vaskinum eins og dýr í taumi. Að lokum kemur kona klædd hvítum buxum og blárri mussu og aumkar sér yfir mig. Hún réttir mér tissjú og færir mér vatn. Þegar hún tekur við tómu glasinu greini ég í augum hennar skilningsríkt bros.
Í garðinum er hola. Þegar ég halla mér aftur í stólnum og gjóa augunum til vinstri sé ég hann liggja í blóði sínu, í tveimur hlutum. Andvana á grænum bakka, vinur minn jaxlinn. "Svona var hann þá klofinn" huxa ég með mér, "líkur mömmu sinni, þessi elska..."

2009-02-08T13:10:00.003Z

Vaknirðu með bauga undir augum eftir reykingar gærdagsins elskan mín þá er bara eitt í stöðunni. Vökvaðu morgunsárið með sítrónuvatni. Spíttu steinunum í vaskinn og myndaðu stafarugl úr orðum þeim sem standa hjarta þínu næst; ksana, skela, atha, angla ... þannig fer nýr dagur um þig mjúkum höndum, í óbeinni útsendingu frá ratsjárstöð á afskekktu fjalli. Kveiktu á sjónvarpinu og virtu fyrir þér snjókomuna á skjánum. Skelltu svo á eftir þér hurðinni þegar þú mætir alvöru veðri. Njóttu samanburðarins. Hlauptu upp hvíta hlíð mót svörtum hömrum þangað til þig verkjar í lungun. Kastaðu þér í jörðina. Snúðu þér á bakið og gleyptu himininn í einum bita.

2009-02-01T23:40:00.004Z

Einum jaxli fátækari nartar hún í jarðaber og horfir yfir ísilagðan fjörð. Hvað skyldi gulltönn kosta margar krónur?

2009-01-22T18:15:00.009Z

Við sitjum í lest. Svo mikið þykist hún vita, litla skottið sem er orðin svona stór. Heillra fjögurra vetra sú arna. Situr roggin og lætur móðan mása á meðan hún bryður púkahlaup. “Mamma, þú mátt fá bleikann” segir hún og brosir eins og Móðir Theresa um leið og hún réttir mér molann sem hún hefur veitt upp úr gulum pakka. Ég reyni að sannfæra hana um að farartækið sé ekki lest heldur rúta en hún tekur ekki aðra eins vitleysu í mál.
Leiðin liggur í gegnum upplýst göng og hvíta firði. Við stefnum að flugvelli sem er handan við þorpið sem er ekki mitt. Sviptivindur ku vera orsökin fyrir breyttum brottfararstað. Hina firðina og bæina í þeim þekki ég eins og lófa minn og í líkama mínum hefur með árunum myndast grafískt landakort af þeim. Hið sama á ekki við um þetta þorp. Húsin eru óreglulega dreifð um hlíðina, göturnar ekki rúðustikaðar á flatri eyri eins og heima. Ég verð áttavilt hérna, hefur aldrei tekist að henda reiður á þessum stað þótt fallegur sé. Þegar við erum á leiðinni út úr þorpinu keyrum við fram hjá kirkjugarði. Upplýstir krossarnir standa vaktina líkt og orðum prýddir riddarar. Veggurinn umhverfis garðinn er steinsteyptur, gamall og hvítur. Yfir hliðinu er bogi, alveg eins og heima, fyrir flóðið.
Ég hef ekki tekið eftir þessum garði fyrr. Auðvitað á hvert þorp sér kirkjugarð. Hvers vegna bregður mér þá svona við að sjá þennan? Ég veit að það tengist minningum sem þyrlast upp í vestfirska vetrinum og ferðalaginu sem við mæðgur erum á. Líklega hefur það fátt að gera með kirkjugarða þannig séð. En ég sakna gamla garðsins heima.

Sólin brýst fram úr skýjunum og fyllir farþegarýmið skærri birtu. Ljósi sem verður að ágengri áminningu um forgengileika. Funuskott miðar af öryggi á þar til gerðan poka og kastar upp fernu af Trópí og pakka af hlaupköllum. Stuttu seinna stöndum við á fjórum jafnfljótum í höfuðborginni. Það er stutt í byltingu.

2009-01-17T19:06:00.002Z

borða hafragraut með sultu
draga krakka á sleða
hætta að hlusta á fréttir

fleiri tillögur?

2009-01-15T17:05:00.003Z

í þessum firði
er veröldin blá
á morgnanna
og kvöldin

bleik og gul á daginn

ég veit af sólinni
handan við brattann
og þegar ég lít til hægri
blasa við svartir hamrar

fór í blokk
í brekku
drakk kaffi
og reykti á svölum
labbaði um bæinn

kom heim og kveikti á útvarpinu
þrumuræða Eiríks
í bland við Bubba
kallar fram minningar
úr litlu þorpi
1987

Gleeeeeðileg jóóóóól!!!!

2008-12-27T14:36:00.000Z

2008-12-18T01:14:00.005Z

flétta músastiga úr fortíðinni
fá sér hveitiköku
og hugsa um appelsín

klifra síðan upp á háaloft
og finna gamalt skraut
í skóinn

Lítið lag um Guð

2008-12-09T15:02:00.007Z

2008-12-04T17:15:00.002Z

já elskurnar
það ríkir stríðsástand í Reykjavík
ómurinn af röddum reiðra
berst um Þingholtin
um Vesturbæinn
sérstaklega á laugardögum
og stundum á mánudögum
og þess á milli má hlusta á
skæruhernað þeirra Víðsjárgutta í Efstaleiti
enn beittari en áður

allt er beittara en áður

manneskjutetrin
sem langaði svo lengi að slá í borð
og stappa niður fæti
og segja hingað og ekki lengra
meira að segja þau (við)
erum farin að hrópa
fylkja liðið
og bera spjöld

"Mamma, ekki fara með mig á mótmælin"
"jú, elskan mín. Það er gott að mótmæla"

fyrirbyggjandi aðgerðir fyrir ungdóminn
ekkert annað í stöðunni

Jebbs,
þetta er Ísland í dag

2008-12-03T18:44:00.004Z

úr grænum hægindastól,
appelsínugulri slæðu
og borðstofustól með leðursetu
hefur Franziska byggt sér lítið hús
inni í því er gul og kringlótt motta
sem á eru teiknaðir spilafætur
ofan á mottunni
og undir slæðuþakinu
liggur sængin hennar hvíta
í sömu stellingu og á sunnudaginn
þegar hún fór til pabba síns

ég tími ekki að hrófla við þessu listaverki
sem smækkar fjarvist hennar
heldur tipla ég um íbúðina
stússast í notalegheitum
og finnst hún vera hér enn
hlý og brosandi
undir sænginni

litli simpansa unginn minn

you are my sister
and I love you
may all your dreams
come true

2008-11-27T17:47:00.002Z

held hún sé að fara að skipta um ham
skottan sú
óumflýjanleg örlög sporðdrekans
sem vill losna við allt
henda selja gefa
sófasettið frá ömmu vínilplötur barnaleikföng borðdúka bókahillur
föt sem bera í sér skorpnar húðflögur
líkamlegar leifar hins liðna
súrt og sætt og allt það ...

skrifar nótur á blað úr hreistri sem hún skefur undan nöglunum
ný stelpa sem sönglar nýtt lag

uppáhalds orðið mitt er "já".

úr bókinni um píslirnar

2008-10-31T12:58:00.003Z

Það hefur farið með versta móti um hjartað í mér undanfarið. Það hefur lamist lengi, og upp á síðkastið hefur verið þröngt um það í brjóstinu eins og brjóstið og hjartað eigi ekki saman lengur. Eitthvað er sem þrengir að rifjunum og í sambandi við þetta gína við mér kolsvört leiðindi og hræðsla í allar áttir, stundum svo að mér verður flökurt. Nú er tími til að byrja á bókinni um píslirnar. Engin lifandi sála nærri, að heitið geti, fegurð heimsins fjarri mér, nema einhver ögn af fegurð himinsins.

(úr formála að Samastaðar í tilverunni eftir Málfríði Einarsdóttur)

2008-10-23T12:01:00.002+01:00

Þett var fyrsti dagur í kreppu núna er ég hætt að telja dagana, dembi mér bara í veturinn, geri málamiðlanir: já það má fá sér kaffi og sígó í morgunsár ef stefnan er sett út í kuldann. Alltílæ að verðlauna sig fyrirfram. Pabbi gamli samdi einu sinni lag sem heitir "Út í kuldann" það er gott lag góð plata hann var líka svo stoltur af því að hafa tekið upp hljóðið í flugvél að taka á loft wroooom! Lýsi brúna litinn með síðustu dropunum úr gulri fernu mig langar heim í vestfirskt heimili að borða harðfisk og drekka kaffisull og hjúkk, bráðum fer ég þangað.

From Copenhagen to Malmö

2008-10-05T11:51:00.009+01:00

Hún er klók sú gamla
þegar ég teygi mig eftir henni
til kasta út í hafsauga
rennur hún mér aftur úr greipum
smeygir sér undir fóðrið
og hringar sig í innanávasanum
malandi af vellíðan
læðan atarna
og þótt ég viti
varir vera bitlausar
og hafi lesið um nauðsyn þess
að beita framtönnum
af festu
vilji maður losna við fornar slóðir
þá gefst ég upp
og hvísla að henni
mjúkum vörum
það gengur bara betur næst ...

já, það er banalt að
ferðast í lest
með rykfallna hjartasorg í farteskinu

2008-09-23T10:30:00.002+01:00

í gær sýndi ég fyrirhyggju
í morgun var til matur í ísskápnum

indjáni II

2008-09-23T01:04:00.007+01:00

F: Mamma, þegar maður verður stór þá má maður vera hvaða indjáni sem maður vill. Hvað ætlar þú að verða þega þú verður stór?

B: Ég var nú bara að hugsa um að búa til bíómyndir.

F: En mamma mín, það er miklu betra að vera indjáni. Viltu ekki bara vera indjáni eins og ég?

indjáni I

2008-09-21T18:25:00.006+01:00

I know where you are
and I know where you are going
I've seen it before
but I like you honey
as the others before you
they're there now
and I am here
without you and them
sucking tounge
and licking blood
but hey
you will always be
my wasabimaaaan
yeah
yeah
yeah

Gosi í nóttinni

2008-09-15T22:28:00.001+01:00

starralæti

2008-09-11T16:47:00.004+01:00

2008-09-10T19:06:00.002+01:00

2008-09-08T15:14:00.003+01:00

þvoði, þurrkaði og pakkaði
og nú er hún flogin
þessi elska
með indverska blessun á enninu

blót

2008-09-08T13:06:00.008+01:00

Þegar ég eignaðist litlu stelpuna mína lenti ég í glufu í kerfinu og átti ekki rétt á fæðingarorlofi. Ég fékk reyndar fæðingarstyrk í þrjá mánuði, 40.000 ISK á mánuði. Alveg hægt að kaupa fullt af bleyjum fyrir það. Dööhh!
Og núna, í fyrsta skipti á ævinni ætlaði ég að skrá mig atvinnulausa, en úpps, aftur glufa (að þessu sinni ísmeygilega plönuð af hönnuðum almannatryggingakerfisins) og sorrý stína, þú getur gætt þér á því sem úti frýs.
thanks for nothing
andsk..
helv...
djöh...!

2008-09-08T03:53:00.004+01:00

Mjá!

ég sakna þín
you hunter
en hey, þú særðir altént fram í mér rokkarann
sem er gott
og ég er farin að glugga aftur í Bukowski
sem er eeeh... gott
you devil

ást og friður

-b.

2008-09-07T00:29:00.002+01:00

2008-09-06T21:49:00.000+01:00

2008-09-05T14:24:00.002+01:00

mig langar í þessi reyniber
klifraðu stelpa
öskraðu
taktu smá Jane á þetta
Eyre
eða me Tarsan you.....
sexy thing

2008-09-04T03:37:00.000+01:00

2008-08-20T12:47:00.000+01:00

hvað merkir blóðbragð í munni?

2008-08-13T14:27:00.004+01:00

Jæja,
ég er alla vega að fara í afmæli á föstudaginn
túddírú
vinn bara allt of mikið
andinn floginn
með lundanum
langt út á Atlantshaf
og ofaní súpúskálar
á veitingastaðnum
Við Tjörnina
Hvað skyldi Marx annars segja við þessu?
"Júúú...(íbygginn), hún er föst í undirbyggingunni stelpuskjátan, ekki víst hún komist nokkuð upp aftur... haaa.... hmmm....(klórar sér í skegginu, augnaráðið föðurlegt.)"

En ég er allavega komin með rafmagn.
Þetta er allt að koma og bíðið bara,
bráðum
verð ég kona
á meðal manna
eða eitthvað
djók
bæ

2008-07-28T03:53:00.004+01:00

sigli bara út á þennan sjó
með lokuð augun
himininn svartur
vinaleg útgáfa
af FUGLUM
Hitchcock's
ljúfustu grey
þessir lundar
Mugison var annars æði
kúl að hafa tvo trommara
og nú dansar Sjonni lokadansinn
við þurfum að koma okkur heim
í þessari úrhellisrigngingunn
en ég kann svo lítið á tölvur
og þið verðið að fletta henni upp þessari;
LE RITA MITSOUKO
elskurnar

handskrifuð bíóauglýsing

2008-07-22T16:53:00.002+01:00

2008-07-14T14:30:00.011+01:00

skakklappaðist upp brekkuna í rigningu og bölvaði sjálfri mér fyrir að hafa afhjúpað skotið á þennan aulalega hátt í staðinn fyrir að brosa kankvís og sjálfsörugg og bjóðast til að gerast bílstjóri í mögulegri pílagrímsferð þinni um Melrakkasléttu

2008-07-10T21:40:00.003+01:00

og farsíminn flaug í sjóinn
liggur nú í skötulíki
á botni Atlantshafs
og deilir mis-svæsinni fortíð eiganda síns
með krossfiskum
og öðrum djöflum

2008-07-03T12:36:00.003+01:00

Sátum undir súð og og hann leit út undan gleraugunum og sagði "ég hélt alltaf að þú yrðir leikkona".

En nú sigli ég um sæinn upp á dag hvern. Veit ekkert hvað hann gerir þessi gleraugnaglámur, man ekki einu sinni hvað hann heitir.

Lundinn er lítill og vitiði bara hvað! Hann skiptir um ham, alveg eins og snákar. Eða allt að því, allavega alveg eins og rjúpan. Ekki eins auðvelt að spotta þessa litlu skratta á veturna, því þá dulbúast þeir og fara í felur.

Því þannig er það nú einu sinni elskurnar mínar að við erum dálítið eins og lundinn. Við erum röndótt en stundum staðföst (lundin er einkvænisfugl) og auðvitað erum við ekki öll þar sem við erum séð. Ég geri ráð fyrir að það eigi við um okkur öll...

2008-06-18T20:25:00.001+01:00

æi kunniði ekki einhverja fallega sumarvísu?

pulsa

2008-06-18T12:12:00.005+01:00

Hvað er hann Geir að rugla?
Er Íslenska þjóðin svona vel í stakk búin til að takast á við kreppu? Tali nú hver fyrir sig skoho. Geir þú þarna gamla geit, ég skora á þig að fá þér þrjár vinnur, búa við rafmagnsleysi og sturtuleysi og peningaleysi og tíma-fyrir-barnið-þitt-leysi. Sjáum hvað þú endist og hananú.
Æi, mér finnst sautjándi júní hvort eð er ekkert skemmtilegur. Átti ekki einu sinni péning fyrir pulsu ...

2008-06-16T17:04:00.000+01:00

langvarandi
rafmagnsleysi
er ágætis hvatning
þegar kemur
að
hráfæði

2008-06-16T16:40:00.005+01:00

og nú á að fara að prófa mann, enn og aftur
nennissuekki....
en bankinn bíður ekki
svo mikið er víst
best að klára þetta
rúlla þessu upp

eða eitthvað

Alla vega...

HEIMILDARMYNDIN KJÖTBORG VERÐUR SÝND Í HÁSKÓLABÍÓI DAGANA 20.-24.JÚNÍ
MÆTIÐI NÚ ELSKURNAR
FJÖRAR STJÖRNUR Í MOGGANUM
EF ÞIÐ SKYLDUÐ ÞURFA FREKARI HVATNINGU

æi, ég elskykkur öll
hikk
hikk

-b.

2008-06-10T17:13:00.002+01:00

elskurnar mínar
mikið sem ég vildi hrifla meira hér
en það er svo ósköp mikið að gera
og stússast
og vinna
og skipuleggja
annars staðar
en það kemur að því

Best að skella sér á sjóinn
á deit með lundunum
það er ég
núna ...

mímímí
Bíbí er orðin lúin
en samt er gaman
ójá!

skák og mát

2008-05-23T14:43:00.003+01:00

Svona er maður nú gamaldags með vatnslausa sturtu og sprungið postulínsöryggi. Eyddi morgninum á óeinangruðu háalofti, innan um rykugar töskur, kattahár og plastkassa með barnafötum. Skrúfaði og skipti en gafst svo upp og dýbbði mér í laugina. Í pottinum fer maður að hugsa allskonar... Til dæmis um jákvæðu hliðar þess að vera svo blankur að maður eyðir morgninum í að velta vöngum yfir því hvort fimmtíköllunum sem eftir eru í jakkavasanum skuli eytt í sundferð eða kaffibolla. Ef maður velur kaffið, þá hrekkur klinkið upp í hálfa sundferð, sem dugar jú skammt. Ef maður velur sundið, nú þá er alltaf hægt að sníkja kaffi hjá góðri vinkonu. Ekki get ég helt upp á heima ... nema mér takist að skrúfa rétta stykkið á réttan stað á eftir þegar ég er búin að láta skrifa hjá mér nýlenduvörur hjá mínum lókal kaupmanni. Lengi lifi þeir! Burt með bankana sem tæla og féflétta mann þar til maður er orðin svo spenggrannur að maður þarf að fara aftur í bankann og sníkja yfirdrátt fyrir fötum í nýjum stærðum.
En sumsé, lífið er dásamlegt og maður miðar best af jaðrinum. Hungruð augu skýra sjónina og hviss!, aldrei að vita nema maður hitti beint í mark. Miðjan er alltaf svo helvíti berskjölduð...
Og nú ætla ég aftur heim á háaloft, að máta ...

2008-05-08T14:56:00.004+01:00

Kjötborg á Skjaldborg. Íhaaah!!

2008-04-21T12:23:00.007+01:00

Kannski er ég farin að gleypa flugur
eins og afi
sem gabbaði okkur Mánasnáðann
og þóttist gleypa hrossaflugu
oooojjjj!!!
sögðum við, fimm og sjö
í sveitinni
því afar plata ekki

En sumsé,
gleðifluga
virðist hafa tekið sér bólfestu í maganum mínum
ég vaknaði brosandi í gær
og er enn brosandi
þetta er ógeðslega væmið
en
ekki gleyma því ljósin mín
að vor eru dásamlega væmin
og sérstaklega hönnuð til að vekja skilningarvitin
af löööngum dvala ...

2008-04-19T00:59:00.000+01:00

tjullitjull

2008-04-19T00:45:00.005+01:00

Jamm, hann mun hanga þarna svona líka rauður og fínn í skápnum fram á haust. En freistandi er hann, því skal ekki leynt. Synd að Páll skuli stiginn af rektorsstólnum. Við hefðum verið svo fín saman í sumrinu. Ekki víst að Stína hafi húmor fyrir svona vitleysu. Og svo kostaði hann bara fimmhundruðkall...

... og striðu

2008-04-15T20:52:00.005+01:00

Tölvan mín er asni.
Þrjú ár liðu allt of hratt.
Og ég sem hélt að við yrðum saman að eilífu
-í blíðu og stríðu

2008-04-10T15:48:00.003+01:00

Er núna hætt að vera gervi-vor?

... og dýrðin

2008-04-07T17:21:00.007+01:00

Ég hef áhyggjur af Gosa. Velti því fyrir mér hvort hann sé sleginn hinum alræmda faraldri vorþyngsla sem alkunna eru hér við ysta mar. Ef til vill veldur þessu ójafnt hlutfall í skömtun alvaldsins á aukinni birtu og aðlögunartímanum sem er nauðsynlegur eigi maður að geta tekið á móti ljómanum og dýrðinni allri. Það kemur enginn út úr skápnum á einum degi, ekki einu sinni blessaðar kýrnar. Það sem áður var mjálm er orðið að undarlegu ískri og Gosi starir melankólskum augum út um stofugluggann. Eyminginn, ég held hann langi í flugu ...

2008-04-03T11:13:00.004+01:00

Í vetur er áætlað að sýndar verði 14 sýningar í Borgarleikhúsinu. Þar af eru tvö verk eftir konur og tveimur verkum er leikstýrt af konum.
Þjóðleikhúsið stendur sig öllu betur, sýnir 18 verk, þar af sex verk eftir konur og flaggar heilum fjórum kvenleikstjórum sem stýra einni sýningu hver.
Fyrir stuttu voru sýndar í Háskólabíói nokkrar myndir undir yfirskriftinni "konur í spænskum kvikmyndum". Leikstjórarnir voru reyndar allir karlmenn.

Konur eru sérfræðingar í stóískri yfirvegun, sama hvað hver segir.

2008-04-02T00:22:00.000+01:00

2008-03-31T16:14:00.011+01:00

Já elskurnar, leikhúsið er brothættur draumur sem þegar best lætur breytir sér í sexvængjað og rammgöldrótt kvikindi, fjórhöfða veru sem veitir blindum sýn.

Þetta er niðurstaðan af stórkostlega skapandi misskilningi sem forvinnan fyrir BA-ritgerð mína leiddi af sér. Nánari rannsókn leiddi hið sanna í ljós, Seraphiminn hans Artaud er ekki sexvængjaður serafi við hlið alvaldsins heldur aðeins jarðneskur senjor Serafino nokkur, ítalskur leikhússpekúlant síðan sautjánhundruð og súrkál. Hann var víst spesíalisti í skuggamyndum karlinn sá...

Draumurinn um leikhúsið
getur valdið ofsjónum
blómin mín
en það er alltílæ
því ofsjónir eru skapandi
hafir þú táslurnar
réttum stað

2008-03-29T13:47:00.006Z

Morgnar sem koma kaldir og heyra undir marsmánuð henta einkar vel til hvítþvotta. Hvaða morgun hentar ekki til að þvo hvítt spyr ég nú bara. Hef ekki vaknað með kolamolann á kassanum lengi en í morgun var hann að myndast við að koma sér fyrir, eins og Gosi þegar hann hringar sig makindalega ofan á bringunni. En seiseisei, þá stekkur maður bara á fætur, opnar út í garð og stingur í vélina. "Og skorstensfejeren gik en tur, gik en tur..." Þvottaefni og ferskt loft gera galdurinn og hviss! brjóstið er hreint, galopið og reiðubúið til að taka á móti undrum þessa sólríka þvottadags. Í þessum degi býr labbitúr niður að sjó, vinna, lestur og afmæli litla bróðurs sem er orðin svo stór. Kolamolinn hefur breyst í sexvængjað fiðrildi sem stafar gylltum geislum í áttir allar.

mini-Kate II

2008-03-27T14:32:00.004Z

mini-Kate I

2008-03-27T14:26:00.001Z

2008-03-25T23:51:00.005Z

ó ó
ég þrái sumar og sól
æ æ
í þessum bæ
við úúúúfinn sæ
úúhúuhúu....

á háaloftinu mjálmar hann kisi minn
best að gera hlé á súkkulaðiátinu
og hleypa honum niður
til mín
inn úr kuldanum
og gefa honum rækjur
og rjóma
friðar samviskubitið
rjóminn

ég sakna skottunnar minnar
sérstaklega á þessum tíma sólahrings
lúin í fótunum eftir vaktina
langar mig að heyra muldrið hennar
upp úr svefninu
nóg af gullkornum þar

en við Gosi höfum það sossum ágætt saman
lónlýblúbojs
og rifjum upp málshætti
síðan í fyrradag
oseisei

2008-03-24T15:18:00.006Z

Margt hefur á dagana drifið og óðum styttist í aprílgabb og húllumhæ í vorinu. Vampírukossinn strauk mér blíðlega og vakti af vetrarblundi. Tunglið var fullt og báran blá og asskoti er gott að pissa í fjörusand.

Í tilefni páskanna var stiginn byltingarsinnaður upprisudans í garðinum.

2008-02-22T12:52:00.006Z

Heyrðu beib, þér er boðið í erfidrykkju útí sveit - a la Amy. Húsið er fúið og kertin skaffa ljósið. Smókingklæddir sveinar leika á brass. Þú þarft ekkert að gera nema grúfa þig í gamlan stól og trúa á ritúalið. Nú, og ef þig skyldi, þegar líður á kvöldið, langa í dansinn ....

2008-02-21T17:21:00.003Z

þau feta fótsporin þín þessi blöð
svona líka fallega rauð og gul
á gömlu stofugólfi
lýsir sólin upp frjókornin
sem stungu af á leiðinni